Ordonnance de Charles V (1369)

Ordonnance qui deffend de joüer à certains Jeux de hazard ou autres ; & qui enjoint de s’exercer à l’Arc et à l’arbaleste, Livre vert du Chastelet, f°151v.

Texte
Charles par la grace de Dieu Roy de France : Au Prevost de Paris ou à son lieutenant : Salut. Savoir faisons, que Nous sesirans de tout notre cuer, le bon estat, seurté & deffense de nostre Royaume, de la chose publique, & de tous noz subgès d’iceluy, voulans obvier à tout inconveniens, & tousjours enduire & gouverner noz bons subgès, en ce qu’il leur puet estre agreable & prouffitable, avons deffendu & defendons par ces présentes, tous geux de Dez, de Tables, de Palmes, de Quilles, de Palet, de Soules, de Billes, & tous autres tels geux, qui ne cheent point à exercer ne habiliter noz dits subgez, à fait et & usaige d’armes, à la deffense de nostredit Royaume, sur paine de quarante sols Parisis, à appliquier à Nous, de chascun & pour chascune foiz qu’il y encherra & voulons &ordenons, que noz diz subgès prennent, & entendent à prenre leurs geux & esbatement, à eulx exercer & habiliter en fait de trait d’Arc ou d’Arbalestres, ès biaux lieux & places convenables à ce, ès Villes Terrouoirs ; & facent leurs dons aux mieulx traians, & leurs festes & joies pour ce, si comme bon vous semblera. Si donnons en mandement à tous, Seneschaux, Baillis, Prevosts, Vicontes, & autres Officiers de nostredit Royaulme, & à chascun d’eulz, fi comme à lui appartendra, que nostre dite ordenance ilz facent tenir & garder sans enfraindre, & mettre à execution de point en point, selon sa fourme & teneur, sur paine d’encourir nostre indignacion, & d’estre punis les remis & negligens, de telles paines, que ce soit example aux autres. En Tesmoing de ce, Nous avons fait mettre nostre Scel à ces presentes letres. Donné en nostre Hostel de Saint Pol lez Paris, le 3e jour d’Avril, l’An de grace mil trois cens soixante neuf, & de notre Regne le quint.

Datation
1369 (A Paris, le 3 avril et le 23 mai 1369)

Auteur
Charles V de France, dit Charles le Sage (Vincennes, 1338 - Beauté-sur-Marne, 1380), roi de France de 1364 à 1380.

Extrait de
SECOUSSE D.-Fr.,Ordonnances des Roys de France de la troisième race, recueillies par ordre chronologique, Vol. V, contenant les Ordonnances de Charles V depuis le commencement de l’année 1367 jusqu’à l’année 1373, Paris, Imprimerie Royale, 1736, p. 172. Consultation en ligne >>>